<b></b> Ballkani Perëndimor, rruga më e përdorur nga emigrantët gjatë vitit 2022

Ballkani Perëndimor, rruga më e përdorur nga emigrantët gjatë vitit 2022

14.06.2022 10:16

Rruga e Ballkanit Perëndimor është tani rruga numër një e preferuar për kontrabandimin e migrantëve të paligjshëm dhe të parregullt në BE, sipas të dhënave të reja nga Frontex, agjencia e rojeve kufitare të BE-së.

Numri i hyrjeve të parregullta në Evropë u rrit me 82% gjatë gjysmës së parë të 2022 krahasuar me të njëjtën periudhë të vitit të kaluar. Gjysma e këtyre kalimeve, ose 40,675 hyrje të paligjshme, erdhën përmes rrugës së Ballkanit Perëndimor.

“Kjo është gati trefishi i shifrës nga e njëjta periudhë e vitit të kaluar. Kombësitë kryesore në këtë rrugë përfshinin sirianë dhe afganë. Shumica e njerëzve të zbuluar kishin qenë në Ballkanin Perëndimor tashmë për disa kohë përpara se të kërkonin të hynin në BE,” sipas Frontex.

Kalimi i paligjshëm u rrit gjithashtu përgjatë Mesdheut Lindor dhe kufirit Lindor, por mbeti relativisht i qëndrueshëm përgjatë rrugës së Mesdheut Qendror.

Emigrimi i paligjshëm përmes Kanalit Anglez drejt Britanisë së Madhe u rrit me 122%, me shtetasit shqiptarë që shënuan një rritje të theksuar në numër që nga mesi i prillit.

Të dhënat e llogaritura nga Frontex përjashtojnë refugjatët ukrainas.

“Sipas të dhënave të fundit të Frontex, më shumë se 5.5 milionë qytetarë ukrainas kanë hyrë në BE nga Ukraina dhe Moldavia që nga fillimi i pushtimit në shkurt”, thuhet në raport.

Në vitin 2021, rruga e Ballkanit Perëndimor ishte rruga e dytë më e përdorur për në Evropë, me 61,735 në një vit. Shifrat aktuale tregojnë se kjo është rritur në mënyrë drastike dhe nëse trendi vazhdon do të dyfishojë shifrën e një viti më parë.

Një kontrabandist i intervistuar nga Exit, shpjegon se si migrantët mund të paguanin për një "paketë" nga Selaniku në Greqi, përtej kufirit shqiptar, për të vazhduar për në Kosovë. Ata që merrnin këtë rrugë do të ndalonin në Tiranë për një ose dy ditë në një shtëpi të sigurt përpara se të vazhdonin drejt kufirit verior.

Ai shpjegon se ka pasur marrëveshje me policinë nga zona të caktuara për të siguruar kalim të sigurt përgjatë pjesëve specifike të rrugës.

Ka një raportime të vazhdueshme të policisë për njerëz që arrestohen për kontrabandë emigrantësh, megjithatë, duket se arrestimet që arrihen të bëhen janë vetëm maja e ajsbergut.

Tjera nga autori:
1