Erdogan: Turqia pret hapa konkret nga Suedia në luftën kundër terrorizmit

Presidenti turk Tajip Erdogan i tha kryeministres suedeze Magdalena Andersson në një bisedë telefonike se Ankaraja pret hapa konkretë në luftën kundër terrorizmit, njoftoi agjencia shtetërore turke e lajmeve Anadolu.

Erdogan tha gjithashtu se beson se embargoja ndaj eksporteve të armëve, e vendosur ndaj Turqisë pas pushtimit të saj në Siri në vitin 2019, duhet të hiqet, shkruan Anadolu. Finlanda dhe Suedia aplikuan zyrtarisht për anëtarësim në NATO tre ditë më parë.

Por Turqia i befasoi aleatët e NATO-s javën e kaluar duke kundërshtuar anëtarësimin e dy vendeve në aleancë. Udhëheqësit perëndimorë besojnë se kundërshtimet e Ankarasë nuk do të jenë pengesë për procesin e pranimit të dy vendeve në NATO.

Ankaraja pretendon se Suedia dhe Finlanda po ofrojnë strehim për njerëzit e lidhur me grupin militant PKK (Partia e Punëtorëve të Kurdistanit) dhe mbështetësit e Fethullah Gulen, të cilin Turqia e akuzon për komplotimin e një përpjekjeje për grusht shteti të vitit 2016.

Presidenti finlandez Sauli Niinisto tha të shtunën se ai kishte biseduar "hapur dhe drejtpërdrejt" me presidentin turk Tajip Erdogan si pjesë e një debati mbi anëtarësimin e Finlandës në NATO.

“Kam thënë se Finlanda dhe Turqia, si aleatë të NATO-s, do të angazhohen për sigurinë e ndërsjellë dhe se marrëdhënia jonë kështu do të bëhet më e fortë”, shkroi Niinisto në Twitter pas një bisede telefonike me Erdogan. "Finlanda dënon terrorizmin në të gjitha format e tij. Ne po vazhdojmë dialogun", shkroi ai në Twitter. /Nacionale/