Kush është Anthony Albanese – kryeministri i zgjedhur i Australisë me prejardhje shqiptare

Kush është Anthony Albanese – kryeministri i zgjedhur i Australisë me prejardhje shqiptare

21.05.2022 17:31

Votuesit australianë i kanë dhënë një goditje të ashpër qeverisë së qendrës së djathtë, duke i dhënë fund nëntë viteve të sundimit konservator, në favor të opozitës së qendrës së majtë që premtoi veprime më të forta ndaj ndryshimeve klimatike.

Udhëheqësi i Partisë Laburiste Australiane Anthony Albanese dukej i sigurt se do të formonte një qeveri të pakicës, megjithëse ishte e paqartë ndërsa numërimi vazhdonte, nëse partia do të kishte vende të mjaftueshme për një shumicë, sipas parashikimeve nga tre rrjete lajmesh.

Partitë kanë nevojë për një shumicë prej 76 vendesh për të formuar një qeveri të shumicës. Laburistët aktualisht janë në rreth 70, sipas Komisionit Zgjedhor Australian.

Numërimi i hershëm tregoi një lëvizje të fortë drejt kandidatëve të të Gjelbërve dhe të Pavarurve, të cilët kërkuan ulje të emetimeve shumë më të larta se angazhimet e marra nga koalicioni i Morrison.

Albanese ka fituar një reputacion si një mbrojtës i sistemit të kujdesit shëndetësor falas të Australisë, një avokat i komunitetit LGBT dhe një tifoz i pasionuar i ligës së regbit.

Siç bëhet e ditur, 59-vjeçari me nofkën “Albo” është rritur në banesa sociale nga një nënë beqare me pension invaliditeti. 

Rrugëtimi i shqiptarit Anthony Albanese për t’u bërë kryeministër i Australisë

Anthony Albanese është i biri i Carlo Abanese-s nga Barletta e Italisë dhe Maryanne Ellery, australiane me prejardhje irlandeze.

Qyteza Barleta shtrihet në jug të Italisë, në rajonin Apulia. Sipas faqes greke, “Greek City Times”, në Apulia jeton një komunitet i madh i arbëreshëve. Besohet se atje jetojnë rreth 100.000 arbëreshë dhe se nga ky komunitet e ka prejardhjen edhe babai i politikanit australian, që ka gjasa të mira për t’u bërë kryeministër.

Një shenjë e fuqishme për prejardhje arbëreshe është mbiemri Albanese, që nga italishtja në gjuhën shqipe do të thotë shqiptar.

Albanese shërbeu si ministër në qeverinë e mëparshme laburiste nën kryeministrat Kevin Rudd dhe Julia Gillard, përpara se të merrte drejtimin e laburistëve pas humbjes së fundit në zgjedhjet e partisë në 2019.

Përveç klimës, këto zgjedhje u fokusuan në karakterin e liderëve. Morrison ishte thellësisht i papëlqyer nga votuesit. Ai i referohej marrjes së vendimeve të vështira gjatë pandemisë dhe shkëputjes së një marrëveshjeje nëndetëse me Francën, por kjo pasqyroi pretendimet për stilin e tij të udhëheqjes si më shumë autoritar sesa bashkëpunues.

Duke folur me mbështetësit e tij të shtunën vonë në mbrëmje, Morrison tha se e kishte telefonuar Albanese dhe e përgëzoi për fitoren e tij në zgjedhje. "Unë kam besuar gjithmonë te australianët dhe gjykimi i tyre dhe gjithmonë kam qenë i përgatitur të pranoj verdiktin e tyre", tha ai.

Pak para mesnatës, Albanese doli për tu brohoritur nga mbështetësit e tij dhe tha se do të kërkonte të bashkonte kombin. "Unë do të punoj çdo ditë për të bashkuar australianët. Dhe unë do të drejtoj një qeveri të denjë për popullin e Australisë".

Ai shtoi: "Unë mund t'u premtoj të gjithë australianëve këtë, pavarësisht se si keni votuar sot, qeveria që unë drejtoj do të respektojë secilin prej jush çdo ditë".

Albanese është përpjekur t'u bëjë thirrje grave duke hedhur idenë për të mbyllur hendekun gjinor të pagave dhe për të përmirësuar opsionet e tyre të karrierës, dhe ka sulmuar koalicionin, duke thënë se "gratë po mbeten prapa" nën qeverinë e Scott Morrison.

Çfarë do të bëjë Albanese si kryeministër?

Një nga prioritetet e para të Albanese si kryeministër do të jetë rindërtimi i marrëdhënieve me liderët e huaj që ai thotë se Morrison i ka lënë pas dore vitet e fundit. Ato përfshijnë liderët e ishujve të Paqësorit, duke përfshirë Ishujt Solomon, lideri i të cilëve nënshkroi një pakt sigurie me Pekinin, duke nxitur frikën se Kina planifikon të ndërtojë bazën e saj të parë ushtarake në Paqësor.

Të martën, Albanese synon të udhëtojë në Tokio me Ministren e Jashtme Penny Wong për bisedime me anëtarët e Quad nga Shtetet e Bashkuara, India dhe Japonia, ku ata do të diskutojnë përparësitë për të mbrojtur kalimin e lirë në Indo-Paqësorin. /Nacionale/

Tjera nga autori:
1