<b></b> Lituanezët mbledhin 5 milionë euro për t’i blerë Ukrainës një dron Bajraktar

Lituanezët mbledhin 5 milionë euro për t’i blerë Ukrainës një dron Bajraktar

29.05.2022 15:06

Qindra lituanianë janë bashkuar për të blerë një dron të avancuar ushtarak për Ukrainën në luftën e saj kundër Rusisë në shenjë solidariteti.

Shuma prej 5 milionë euro u mblodh në vetëm tre ditë e gjysmë - kryesisht në shuma të vogla midis 5 dhe 100 euro - për të financuar blerjen e një droni ushtarak Bajraktar TB2, raporton Laisves TV.

"Para se të fillonte kjo luftë, askush nga ne nuk mendonte se do të blinim armë. Por tani është një gjë normale. Duhet bërë diçka që bota të përmirësohet," ka thënë Agne Belickaite, 32 vjeç, e cila dha 100 euro sapo mbledhja e fondeve filloi të mërkurën.

"Unë kam dhuruar për të blerë armë për Ukrainën, dhe do ta bëj këtë deri në fitore," i tha ajo Reuters, duke shtuar se ishte e motivuar pjesërisht nga frika se Rusia mund të sulmonte Lituaninë.

Droni është dëshmuar efektiv në vitet e fundit kundër forcave ruse dhe aleatëve të tyre në konfliktet në Siri dhe Libi, dhe blerja e tij po organizohet nga Ministria e Mbrojtjes e Lituanisë, e cila planifikon të nënshkruajë një letër qëllimi për të blerë dronin nga Turqia javën e ardhshme.

Ukraina ka blerë më shumë se 20 drone të armatosur Bajraktar TB2 nga kompania turke Baykar në vitet e fundit dhe ka porositur 16 të tjerë më 27 janar. Dërgesa u dorëzua në fillim të marsit.

"Ky është rasti i parë në histori kur njerëzit e zakonshëm mbledhin para për të blerë diçka si Bajraktar. Është e paprecedentë, është e pabesueshme," tha për Laisves TV Beshta Petro, ambasadori i Ukrainës në Lituani.

Shumica e armëve të rënda që vendet e NATO-s i kanë dërguar Ukrainës deri më tani janë armë të prodhuara nga sovjetikët që ende gjenden në inventarin e vendeve anëtare të NATO-s të Evropës Lindore.

"Ndërsa qeveritë e vendeve më të mëdha të botës po diskutojnë pafundësisht... Shoqëria lituaneze  është gati të mbledhë fonde prej 5 milion € dhe të blejë dronin - që është një mesazh mbresëlënës për botën," ka thënë Belickaite.

Tjera nga autori:
1