<b>Shqetësime </b> për paktin me Kinën, ShBA do të nisë një delegacion për në ishujt Solomon

Shqetësime për paktin me Kinën, ShBA do të nisë një delegacion për në ishujt Solomon

19.04.2022 20:22

ShBA po dërgon dy zyrtarë të lartë në Ishujt Solomon mbi shqetësimet se Kina mund të krijojë një prani ushtarake në shtetin ishullor të Paqësorit Jugor.

Shtëpia e Bardhë tha të hënën se më vonë këtë javë, Kurt Campbell, koordinatori Indo-Paqësor i Këshillit të Sigurisë Kombëtare dhe Daniel Kritenbrink, ndihmës sekretari i shtetit për çështjet e Azisë Lindore dhe Paqësorit, do të kryesojnë një delegacion zyrtarësh të qeverisë amerikane në Ishujt Solomon dhe gjithashtu do të vizitojnë Fixhin dhe Papua Guinenë e Re.

Në Pekin, zëdhënësi i Ministrisë së Jashtme kineze Wang Wenbin tha të martën se ministri i Jashtëm Wang Yi dhe homologu i tij në Ishujt Solomon, Jeremiah Manele, kanë nënshkruar zyrtarisht një marrëveshje sigurie, pa dhënë detaje për ditën se kur është nënshkruar.

Një draft i paktit, i cili u zbulua në internet, thoshte se luftanijet kineze mund të ndalonin në Ishujt Solomon dhe Kina mund të dërgonte policinë dhe forcat e armatosura atje "për të ndihmuar në ruajtjen e rendit shoqëror".

Wang u tha gazetarëve në një konferencë ditore se marrëveshja mbulon "ruajtjen e rendit shoqëror", së bashku me mbrojtjen e jetës dhe pronës, ofrimin e ndihmës humanitare dhe reagimin ndaj fatkeqësive natyrore.

Ishujt Solomon kanë kërkuar të minimizojnë rëndësinë e marrëveshjes dhe thonë se ajo nuk do të çojë në krijimin e një baze ushtarake nga Kina atje, por shumë vende fqinje dhe vende perëndimore mbeten të shqetësuar për këtë marrëveshje.

Zëdhënësi i Departamentit të Shtetit të ShBA Ned Price tha se marrëveshja mund të destabilizojë Ishujt Solomon dhe mund të vendosë një precedent shqetësues për rajonin më të gjerë të Paqësorit.

Tjera nga autori:
1