Udhëheqësit botërorë takohen në Gjermani për samitin e radhës së G7-ës

Kancelari gjerman Olaf Scholz po mirëpret sot krerët e G7-ës në një samit tre-ditor në Alpet bavareze të lënë në hije nga lufta në Ukrainë dhe pasojat e saj të gjera, nga mungesa e energjisë e deri te kriza ushqimore.

Samiti zhvillohet në atmosferë më të zymtë se vitin e kaluar, kur liderët britanikë, kanadezë, francezë, gjermanë, italianë, japonezë dhe amerikanë u takuan për herë të parë që nga para pandemisë COVID-19 dhe u zotuan për një rikthim më të fuqishëm

Rritja e çmimeve globale të energjisë dhe ushqimeve po godet rritjen ekonomike në vazhdën e pushtimit rus të Ukrainës.

Kombet e Bashkuara paralajmëruan të premten për një “krizë të paprecedentë urie globale”.

Ndryshimet klimatike, një Kinë gjithnjë e më e sigurt dhe rritja e autoritarizmit janë gjithashtu të vendosura në axhendë.

Udhëheqësit e G7 pritet të kërkojnë të tregojnë një front të bashkuar për të mbështetur Ukrainën për aq kohë sa është e nevojshme dhe për të rritur presionin ndaj Kremlinit – edhe pse ata do të duan të shmangin sanksionet që mund të nxisin inflacionin dhe përkeqësojnë krizën e kostos së jetesës që ndikon në njerëzit e vet.

“Mesazhi kryesor nga G7 do të jetë uniteti dhe koordinimi i veprimit… Ky është mesazhi kryesor, që edhe në kohë të vështira… ne i përmbahemi aleancës sonë”, tha një zyrtar i BE-së.

Partnerët e G7 do të bien dakord për të ndaluar importet e arit nga Rusia, tha një burim i njohur me këtë çështje për Reuters. Një burim i qeverisë gjermane tha më vonë se liderët po bënin biseda "vërtet konstruktive" për një kufi të mundshëm të çmimit të importeve të naftës ruse.

Udhëheqësit e G7 pritet gjithashtu të diskutojnë opsionet për trajtimin e rritjes së çmimeve të energjisë dhe zëvendësimin e importeve të naftës dhe gazit rus.

Samiti zhvillohet në kështjellën e Schloss Elmau në rrëzë të malit më të lartë të Gjermanisë, Zugspitze - i njëjti vend ku ishte mbajtur për herë të fundit në Gjermani në 2015. Më pas, agresioni rus kundër Ukrainës dominoi axhendën një vit pas pushtimit të Krimesë nga Moska.

Samiti është gjithashtu një shans për Scholz që të përfitojë nga të qenit mikpritës duke shfaqur një udhëheqje më të sigurt për krizën e Ukrainës.

Kancelari u zotua për një revolucion në politikën e jashtme dhe të mbrojtjes gjermane pas pushtimit të Rusisë në shkurt, duke premtuar se do të forcojë ushtrinë me një fond prej 100 miliardë eurosh dhe do të dërgojë armë në Ukrainë.

Por kritikët që atëherë e kanë akuzuar atë për zvarritje dhe dërgim të mesazheve të përziera duke paralajmëruar se Rusia mund ta perceptojë NATO-n si një palë lufte dhe duke theksuar rrezikun e luftës bërthamore.

G7 u themelua në 1975 si një forum për vendet më të pasura për të diskutuar kriza të tilla si embargoja e naftës OPEC.

Ajo u bë G8 pasi Rusia u pranua gjashtë vjet pas rënies së Bashkimit Sovjetik. Por Moska u pezullua në vitin 2014 pasi aneksoi Krimenë nga Ukraina.