<b></b> Ministri s’ka informata për mungesën e ilaçeve bazike në QKUK, familjarët në kredi për të blerë terapitë

Ministri s’ka informata për mungesën e ilaçeve bazike në QKUK, familjarët në kredi për të blerë terapitë

28.05.2022 09:04

Mijëra euro në muaj veç për barna, për fëmijët e prekur nga sëmundja e Fibrozës Cistike, shpenzojnë prindërit e tyre. Të gjitha ilaçet i blejnë ata vetë. Shumë nga ta, edhe kanë hy në kredi, vetëm për vetëm, që t’ua zgjasin jetën fëmijëve të tyre. Për gjendjen e kësaj kategorie të pacientëve u fol të enjtën në Kuvendin e Kosovës. Por ministri Latifi, di pak se si shkon furnizimi me këto ilaçe të shtrenjta për fëmijët që bartin këtë sëmundje. Madje ai tha se u shërbye me informata të pasakta nga vetë ministria që ai e drejton.

“Kam hy në borxhe shumë për të blerë terapi për sëmundjen e djalit. Kredi pas kredie.” Këto janë fjalët dëshpëruese përmes së cilave një prind tregon me pak fjalë gjendjen në shëndetësinë kosovare.

Sherif Uka nga Prishtina ka disa vite që ballafaqohet me sëmundjen e djalit të tij të vetëm.

Djali i Sherifit pak muaj pas lindjes është diagnostikuar me sëmundjen e rrallë “Fibrozë Cistike”, sëmundje gjenetike që karakterizohet nga një bllokim dhe infeksion i rrugëve të frymëmarrjes e mangësi në tretje.

Sherifi bashkë me Shoqatën për Fibrozë Cistike, kryetar i së cilës është, para një muaji kanë protestuar para dyerve të Ministrisë së Shëndetësisë duke kërkuar që shteti t’ua zgjasë dorën atyre.

“Për nëntë vjet mund t’ju garantoj që ‘Creon’ kam marrë diku pesë here. Që i bie për nëntë vjet kam marrë diku për tre muaj barna. Kurrë nuk ka pasë barna”, pati thënë Uka në protestën para dyerve të MSH-së.

Për këtë temë, pak ka informata edhe Ministri i Shëndetësisë kosovare, Rifat Latifi.

Por pikërisht për ilaçin bazik për këtë sëmundje, creon-in, u fol të enjtën në Kuvendin e Kosovës.

Gjatë seancës së rregullt të Kuvendit, deputeti i Vetëvendosjes, Eman Rrahmani, i kërkoi detaje ministrit të Shëndetësisë, Rifat Latifit për furnizimin me barna, secifikisht creon-in për këtë kategori.

“Duke e parë mungesën e barnave për të sëmurët me Fibrozë Cistike, në veçanti me creon-in, ku të sëmurët me Fibrozë Cistike nuk mund t'ia dalin pa këtë, jemi të shqetësuar me gjendjen e tyre. Pse ka ndodhë që shteti të mbesë pa creon për një kohë të gjatë, pasi që dihet se ky ilaç vjen si donacion”, pyet Rrahmani.

E ministri Latifi, qytetarëve u shërbeu përmes Kuvendit informata të rrejshme sa i përket furnizimit me këto ilaçe.

Në përgjigjen e parë Latifi tha këtë arsyetim.

“Lidhur me barnat e nevojshme për trajtimin e Fibrozës Cistike, ju informoj se Ministria e Shëndetësisë ka ndërmarrë të gjithë hapat e nevojshëm të sigurimit komplet të terapisë ‘Pankreolipos’, ‘Creon’, ‘Doloz’ dhe vitamina për 122 pacientët e regjistruar në Klinikën Pediatrike të Kosovës. Sa i përket produkteve ‘Pankrelipous’, ‘Creon’, MSH ka kontraktuar të njëjtit me dyfortësitë. Në QKUK ka filluar furnizimi me 10 mijë njësi. Brenda ditësh QKUK do të furnizohet edhe me produkte të tjera’ Pankreolipuoz’ 25 mijë. Dua t’ju informoj se në MSH jemi duke e hartuar edhe koncept-dokumentin për sëmundjet e rralla, e pastaj do të shohim se si do të mund ta sigurojmë blerjen e tyre për qytetarët në nevojë”, tha në përgjigjen e parë Latifi.

Deputeti Rrahmani, sërish e pyeti ministrin Latifi se a ka doza të mjaftueshme të ilaçeve për këtë kategori të pacientëve.

Por Latifi këtë herë refuzoi të përgjigjej.

E derisa në Kuvend po diskutohej tjetër gjë, deputetit Rrahmani, prindërit live i ankohen për mungesë të ilaçeve, sidomos creonit.

“Më erdhi një mesazh nga njëri nga prindërit që e ka djalin e sëmurë me Fibrozë Cistike: "Sot për shkak të "adekut", djalin e kam të shtrirë në spital. Veç ‘Creoni 6000’, tjerë nuk ka në spital që mund të merren. ‘Creon’ 6000 është për moshë shumë të vogël. Moshat e tjera e kanë të pamundur të furniziohen me 'Creon'.”

E Latifi krejt në fund, në përgjigjen e dytë, tha se informatat që i janë dhënë nga MSH ka mendu që i ka të sakta.

“Unë informatata që i kam, kam mendu që i kam të sakta. Menjëherë sa të dal prej këtu, unë do të merrem me këtë", tha Latifi nga foltorja e Kuvendit.

E në vendin tonë, në shtator të vitit 2019, ishte nënshkruar lista e re e barnave esenciale për qytetarët e Kosovës, në kuadër të së cilës ishin vendosur edhe medikamentet kryesore për fibrozë cistike, si: Pulmozyme-Dorase alfa, Creon, Multivitamin-A.d.e.k kapsula dhe Pika, Mucoclear 3% dhe 6% dhe Antibiotikë të ndryshëm.

Që nga ajo kohë, disa prej tyre nuk kanë qenë asnjëherë në dispozicionin e pacientëve. Për pasojë, ata janë detyruar t’i sigurojnë përmes donacioneve apo në mënyra të tjera alternative.

Në Kosovë janë rreth 132 fëmijë të prekur me fibrozë cistike, e cila njihet si sëmundje trashëguese që shkakton probleme të mëdha në mushkëri, zorrë, mëlçi dhe pankreas. /Nacionale.com/

Tjera nga autori:
1