Ismet Munishi u shfaq mjaft i kënaqur në përfundim të takimit kur u prononcua rreth fitores së thellë prej 5 me 0 që skuadra e tij e arriti ndaj Drenicës.

"Realisht kemi bërë edhe më herët lojë të mira, pavarësisht që nuk i kemi marrë rezultatet pozitive. Ballkanin në pjesën e dytë e kemi dominuar. Krejt çfarë nuk na ka shkuar në favor tonin gjatë ndeshjeve të kaluara, sot gjithçka na shkoi për dore. Golat i shënuam me kohë. Ndeshja kur ishte rezultati 2 me 0 mendova që duhet të gjenim edhe golin e tretë, pasi nëse do të pësonim, do të rihapej loja dhe kthehej të anën e kundërt. 

"Të gjithë sot luajtën mirë. Zhvilluam një ndeshje të mirë ndaj një kundërshtari shumë të fortë. Ne do të luftojmë deri në ndeshjen e fundit. Pavarësisht gjithash, ne duhet t'i fitojmë ndeshjet tona. Në futboll është gjithçka e mundur. Do të shkojmë në çdo ndeshje për fitore", deklaroi trajneri i Gjilanit, Ismet Munishi.

Pas këtyre ndeshjeve të Superligës së Kosovës, Ballkani mbetet lider me 60 pikë, derisa Gjilani rikthehet në pozitën e dytë me 52 sosh.

Ndërkohë, Dukagini zë pozitën e tetë me 30 pikë, derisa Drenica renditët e gjashta me 35 sosh.

Trajneri i Dukagjinit, Armend Dallku, ka vazhduar t'i kritikojë gjyqtarët për pikët që skuadra e tij po i humbet. Ata sot shënuan disfatë me rezultat 0 me 1 nga Ballkani, por ankesat kryesore i ka për shkak të përjashtimit nga loja të Bujar Shabanit, me dy kartona të verdhë, që erdhi në pjesë të dytë.

"Ky gjyqtar është jo kompetent. Nuk është hera e parë që na dëmton. Tashmë është e ditur. Pësuam një gol shumë naiv. Pavarësisht që munduam t'i bëjmë ndryshimet edhe në formacion, edhe në skemë - ky ishte maksimumi që mund të bënim. Tani shpresojmë në gabimet e kundërshtarëve dhe nëse ekziston ky vullnet i treguar nga lojtarët sot, atëherë besoj që mund t'ia dalim ta shmangim zonën e barazhit", deklaroi trajneri vushtrrias i Dukagjinit, Armend Dallku.

Trajneri i Ballkanit, Ilir Daja, në fund të takimit u shpreh për atë çfarë ngjau në ndeshjen e sotme, ku ekipi i tij fitoi me rezultat 0 me 1, falë golit të shënuar nga Korenica.

"Kishim një transfertë të vështirë në Dukagjin. Edhe era ishte gjatë gjithë kohës duke na vështirësuar punët. E rëndësishme është që vazhdojmë ecurinë e rezultateve pozitive. Faza e katërt e nisur me fitore me një transfertë delikate si kjo, është hap i mirë. Edhe barazimi nuk do të ishte rezultat i keq. Arsyeja pse e futa në lojë Zekën ishte që është i zoti me topat në thellësi", deklaroi trajneri Daja.

Trajneri i Drenicës, Tahir Lushtaku, ka folur menjëherë pas debaklit që pësoi ekipi i tij nga Gjilani.

"Realisht në pjesën e parë patëm 3-4 raste ideale për të shënuar gol, por ne nuk ishim të saktë. Përkundrazi, i pësuam dy gola ku ia falëm Gjilanit. Mendoj që në pjesë të parë edhe pse kemi qenë në disavantazh 2 me 0, kemi qenë më të mirë. Për pjesën e dytë s'kam koment. Nuk ia vlen të flitet", përfundoi trajneri i Drenicës.

Ballkani dhe Gjilani kanë arritur të shënojnë dy fitore të rëndësishme. Ekipi therandas në minutën e 82-të përmes lojtarit kreativ, Meriton Korenica, ia doli ta zhbllokojë ndeshjen dhe të dalë me tri pikë të plota nga një takim ku vuajti shumë, por që u bë më i lehtë pas përjashtimit nga loja me dy kartona të verdhë të Bujar Shabanit.

Në anën tjetër Gjilani siguroi fitore të thellë prej 5 me 0, duke deklasuar Drenicën. Distanca mes ekipit të udhëhequr nga Ilir Daja dhe gjilanasve mbetet e njëjta, prej 8 pikësh, njësoj sikurse para fillimit të këtyre takimeve.

96' GOOOOL!

Gerard Progni ka shënuar golin e fundit në këtë takim, për ta çuar epërsinë në 5 me 0 ndaj Drenicës. Kësisoj ekipi i Ismet Munishit i rikthehet fitoreve pas një kohe relativisht të gjatë dhe ky ishte goli i 17-të në kampionat i sulmuesit shqiptar, Gerard Progni.

83' GOOOL!

Meriton Korenica zhbllokon ndeshjen. Ai mposhti në këndin e tij portierin Muhaxhiri. Kësisoj therandasit kalojnë në epërsi me rezultat 0 me 1.

80' GOOOL!

Një aksion shumë mirë i ndërtuar nga Gjilani, përfundoi me një asist të mençur nga Cale, i cili shërbeu Blerim Krasniqi, ku sulmuesi nuk gaboi dhe dërgoi topin në rrjetë.

76' GOOOL!

Donjet Shkodra e ka finalizuar për mrekulli asistin e dhënë nga Cale, për ta çuar rezultatin në 3 me 0 ndaj Drenicës.

64' Mesfushori defanziv, Bujar Shabani, ka pranuar edhe kartonin e dytë të verdhë në këtë takim, për t'u përjashtuar kësisoj nga loja. Tani ekipi vendas do të luajë me një lojtar më pak. Rast i mirë për therandasit që ta gjejnë golin, në një ndeshje ku ende vazhdojnë të mbesin portat e patundura.

60' Dren Gashi i është afruar shënimit të golit, por për fare pak nuk arriti ta devijonte topin në rrjetë. Rezultati vijon të jetë 0 me 0 mes Dukagjinit dhe Ballkanit. Nëse mysafirët dominuan në pjesën e parë, e njëjta nuk mund të thuhet për pjesën e dytë, ku Dukagjini krijoi disa gjysmë raste dhe raste të mira.

52' Sulmuesi klinas, Altin Merlaku, ishte shumë afër ta dërgojë në epërsi ekipin vendas. Goditjen e kapitenit Merlaku me kokë e ndali gardiani i portës therandase, Ljuljanovic.

Akoma pa gola në Klinë mes Dukagjinit dhe Ballkanit.

46' Kanë filluar pjesët e dyta në të dy ndeshjet që po luhet sot, Dukagjini : Ballkani dhe Gjilani : Drenica. Në Klinë akoma nuk ka gola të shënuar, kurse në Gjilan ekipi i Ismet Munishit po kryeson me dy gola epërsi, me autogolin e Lushtakut dhe eurogolin e Razak.

Kanë përfunduar pjesët e para në dy ndeshjet e sotme që po zhvillohen në Gjilan dhe Klinë.

Gjilani udhëheq me rezultat 2 me 0, me golat që realizuan Lushtaku (autogol) dhe Razak, kurse në Klinë vijon të jetë rezultati 0 me 0.

42' GOOOL!

Razak ka gjetur golin e dytë në ndeshje për Gjilanin. Goditjen e tij spektakolare me këmbën e majtë nga këndi gjysmë i vdekur, nuk pati asnjë mundësi ta ndalonte portieri i Drenicës, Smakiqi. 

Gjilani udhëheq me rezultat 2 me 0 ndaj Drenicës.

23' Portieri i Gjilanit, Enea Koliçi, për mrekulli ia ka dalur ta shpëtojë një gol të sigurt, pasi Kreshnik Uka u gjend përballë portës, por ky i fundit me zgjatje të këmbës e devijoi topin në këndore.

Gjilani po udhëheq me rezultat 1 me 0 ndaj Drenicës.

14' GOOOL!

Shkëlzen Lushtaku pa dashje devijoi topin në rrjetë, duke shënuar kështu autogol, për ta kaluar në avantazh ekipin vendas. Topin që e futi Torasa drejt zonës, bëri që mbrojtësi Lushtaku të mos ia dilte ta devijonte siç duhet, me topin që pastaj u fut në rrjetë.

12' Ballkani po shfaqet dominues në këtë fillim të ndeshjes, ku në minutën e 5-të pati një mundësi të mirë të shënonte me Blendi Baftiun, por ky i fundit nuk u tregua klinik.

Rezultati mes Dukagjinit dhe Ballkanit vijon të jetë 0 me 0.

1' Ka filluar ndeshja mes Dukagjinit dhe Ballkanit.